shola-e-ishq ko KHud baDh ke hawa di maine

sho'la-e-'ishq ko ḳhud baḌh ke havā dī maiñ ne

aag ḳhud dāman-e-hastī meñ lagā dī maiñ ne

shab-e-furqat kī siyāhī jo zarā tez huī

sham' yādoñ kī tirī dil meñ jalā dī maiñ ne

bas-ki thī kaifiyat-e-zauq-e-mohabbat bhī fareb

kab ye samjhā ki jab ik 'umr gañvā dī maiñ ne

mujh se baḌh kar koī pāband-e-vafā kyā hogā

zer-e-shamshīr bhī qātil ko du'ā dī maiñ ne

us ne bhūle se bhī pūchhā na kabhī haal mirā

zindagī jis ke tasavvur meñ luTā dī maiñ ne

lauT kar aa.ī na āvāz na aayā koī

is ḳharābe meñ ka.ī baar sadā dī maiñ ne

phir dhaḌak kar dil-e-'arshad' ye sadā detā hai

dekh lo vaqt kī raftār baḌhā dī maiñ ne

sho'la-e-'ishq ko KHud baDh ke hawa di main ne

aag KHud daman-e-hasti mein laga di main ne

shab-e-furqat ki siyahi jo zara tez hui

sham' yaadon ki teri dil mein jala di main ne

bas-ki thi kaifiyat-e-zauq-e-mohabbat bhi fareb

kab ye samjha ki jab ek 'umr ganwa di main ne

mujh se baDh kar koi paband-e-wafa kya hoga

zer-e-shamshir bhi qatil ko du'a di main ne

us ne bhule se bhi puchha na kabhi haal mera

zindagi jis ke tasawwur mein luTa di main ne

lauT kar aai na aawaz na aaya koi

is KHarabe mein kai bar sada di main ne

phir dhaDak kar dil-e-'arshad' ye sada deta hai

dekh lo waqt ki raftar baDha di main ne