sholon ki hukumat hai chaman zer-o-zabar hai

sho'loñ kī hukūmat hai chaman zer-o-zabar hai

mausam hai bahāroñ kā magar raqs-e-sharar hai

socho to har ik dil meñ haiñ nafrat ke sharāre

dekho to har ik shaḳhs baham shīr-o-shakar hai

mazlūm se hamdardiyāñ zālim se rah-o-rasm

ai chāra-gar-e-ġham tū idhar hai ki udhar hai

ghar meñ jo chhupe baiThe haiñ un ko bhī to dekho

bāhar ke harīfoñ pe to ham sab kī nazar hai

ik aañkh kī qismat ki jo aañsū hai vo paanī

ik aañkh meñ jo ashk hai mānind-e-guhar hai

ik haal pe Thahrā hai na Thahregā zamāna

har sub.h kī ik shaam hai har shab kī sahar hai

haiñ ahl-e-nazar dard kī daulat se tahī-dil

dil jis ko mayassar hai vo mahrūm-e-nazar hai

bikhre haiñ dar-o-bām pe tābinda haqā.eq

sone kā nahīñ vaqt ye hangām-e-sahar hai

sar le ke hathelī pe 'azīz' aa.eñ yahāñ log

ye rāh-e-‘azīmat hai shahādat kā safar hai

sho'lon ki hukumat hai chaman zer-o-zabar hai

mausam hai bahaaron ka magar raqs-e-sharar hai

socho to har ek dil mein hain nafrat ke sharare

dekho to har ek shaKHs baham shir-o-shakar hai

mazlum se hamdardiyan zalim se rah-o-rasm

ai chaara-gar-e-gham tu idhar hai ki udhar hai

ghar mein jo chhupe baiThe hain un ko bhi to dekho

bahar ke harifon pe to hum sab ki nazar hai

ek aankh ki qismat ki jo aansu hai wo pani

ek aankh mein jo ashk hai manind-e-guhar hai

ek haal pe Thahra hai na Thahrega zamana

har subh ki ek sham hai har shab ki sahar hai

hain ahl-e-nazar dard ki daulat se tahi-dil

dil jis ko mayassar hai wo mahrum-e-nazar hai

bikhre hain dar-o-baam pe tabinda haqaeq

sone ka nahin waqt ye hangam-e-sahar hai

sar le ke hatheli pe 'aziz' aaen yahan log

ye rah-e-‘azimat hai shahadat ka safar hai