شوخیٔ درد دل زار گل نغمہ ہے

شوخیٔ درد دل زار گل نغمہ ہے

اس کا ہر لہجۂ گفتار گل نغمہ ہے

سوئی سوئی سی خلاؤں کو ہم آغوش کرو

قلزم زخم سے بیدار گل نغمہ ہے

خواب امکان وفا ہے وہ مجسم کوئی

ہم ہوئے جس کے پرستار گل نغمہ ہے

چاندنی کی ہے نئی شمع شگفتہ پر نور

سر تا پا عشق کا شہکار گل نغمہ ہے

چاند سورج یہ ستارے ہیں شرارے اس کے

اس کی انگڑائی تو انوار گل نغمہ ہے

شش جہات اس کے ہیں اوراق ضیا اوڑھے ہوئے

مسکراتا ہوا سنسار گل نغمہ ہے

موج در موج بدن کرتا ہے جادو جیسے

ہر ادا اس کی پر اسرار گل نغمہ ہے

آئنہ سی ہے وہ دوشیزہ محبت کی مثال

ہونٹ شعلہ ہے تو رخسار گل نغمہ ہے

رشتۂ روح نے باندھا ہے ہمیں کس کے ندیمؔ

میں قلندر ہوں مرا یار گل نغمہ ہے