شور دل میں اس طرف کی خامشی سے بچ گئی

شور دل میں اس طرف کی خامشی سے بچ گئی

اک محبت پھر کسی دیوانگی سے بچ گئی

وہ گماں اس کا کہ ہے خوشیوں کی منزل کوئی اور

رنج یہ میرا کہ وہ اپنی خوشی سے بچ گئی

جسم و جاں کو روشن و سرشار کرتی اک کھنک

میں لئے پھرتا ہوں جو اس کی ہنسی سے بچ گئی

میں نے جانا اب ہوا ہر آگ سے خالی یہ دل

اک یہ چنگاری کہاں اس پھلجھڑی سے بچ گئی

نت نئے رستے بنا لیتا ہے سیلاب بلا

کون سی بستی ہے جو غارت گری سے بچ گئی

دن وہ اچھا جس میں اجیالے کا میلا پن نہ ہو

رات وہ اچھی جو کالی روشنی سے بچ گئی

اک زمانہ میں بڑا شہرا تھا میری عقل کا

اب تو بس وہ ہے جو زعم آگہی سے بچ گئی

شعر کیوں کہتے ہو اعظمؔ یہ سخن کس کے لیے

اب غزل مقبول ہے جو شاعری سے بچ گئی