شور کے دریاؤں میں گہرا اترنا آ گیا

شور کے دریاؤں میں گہرا اترنا آ گیا

خامشی کو خامشی کی موت مرنا آ گیا

تیری پلکوں نے سکھایا گر کے اٹھ جانا ہمیں

تیری زلفوں سے بکھرنے پر سنورنا آ گیا

اس سے پہلے ہم کسی بھی خوف سے واقف نہ تھے

تجھ سے بچھڑے تو بچھڑ جانے سے ڈرنا آ گیا

رات تھی وہ پیاس کی شدت کہ جاں ہونٹھوں پہ تھی

وہ تو کہیے یاد ان ہونٹھوں کا جھرنا آ گیا

قہقہوں سے ہم مٹا دیتے تھے جس تصویر کو

اس کو ماتھے کی شکن بن کر ابھرنا آ گیا