shuur-e-ishq hai to be-niyaz-o-be-guman ho ja

shu'ūr-e-'ishq hai to be-niyāz-o-be-gumāñ ho jā

shi'ār-e-'ishq ye hai aap apnā rāz-dāñ ho jā

agar hai ārzū-e-rif'at-e-fikr-o-nazar dil meñ

ba-faiz-e-ḳhāksārī tū zamīñ par āsmāñ ho jā

tū hī hai markaz-e-hastī tū hī hai maḳhzan-e-hastī

nazar se parda-e-ġhaflat uThā de jāvedāñ ho jā

agar hai jazb-e-dil sādiq ḳhamoshī ḳhud hī bolegī

na le ehsāñ zabāñ kā ḳhud hī sar-tā-pā zabāñ ho jā

tirī hastī hī kyā hai guuñj hai ye sāz-e-fitrat kī

ham-āhang-e-sadā-e-sāz ho kar naġhma-ḳhvāñ ho jā

jahān-e-āb-o-gil meñ hai bazāhir jalva-e-kasrat

ye vahdat kā tamāshā hai tū is kā rāz-dāñ ho jā

ġhulām-e-rang-o-bū ban kar na jī tū sahn-e-gulshan meñ

'aqīdat ke gulistāñ kī bahār-e-be-ḳhizāñ ho jā

suḳhan-goī barā.e-dād hai ik sa'i-e-lā-hāsil

mohabbat kī zabāñ hī likh diloñ kā tarjumāñ ho jā

shu'ur-e-'ishq hai to be-niyaz-o-be-guman ho ja

shi'ar-e-'ishq ye hai aap apna raaz-dan ho ja

agar hai aarzu-e-rif'at-e-fikr-o-nazar dil mein

ba-faiz-e-KHaksari tu zamin par aasman ho ja

tu hi hai markaz-e-hasti tu hi hai maKHzan-e-hasti

nazar se parda-e-ghaflat uTha de jawedan ho ja

agar hai jazb-e-dil sadiq KHamoshi KHud hi bolegi

na le ehsan zaban ka KHud hi sar-ta-pa zaban ho ja

teri hasti hi kya hai gunj hai ye saz-e-fitrat ki

ham-ahang-e-sada-e-saz ho kar naghma-KHwan ho ja

jahan-e-ab-o-gil mein hai bazahir jalwa-e-kasrat

ye wahdat ka tamasha hai tu is ka raaz-dan ho ja

ghulam-e-rang-o-bu ban kar na ji tu sahn-e-gulshan mein

'aqidat ke gulistan ki bahaar-e-be-KHizan ho ja

suKHan-goi barae-dad hai ek sa'i-e-la-hasil

mohabbat ki zaban hi likh dilon ka tarjuman ho ja