shuur-o-fikr se aage nikal bhi sakta hai

shu.ūr-o-fikr se aage nikal bhī saktā hai

mirā junūn havāoñ pe chal bhī saktā hai

mire gumāñ pe uThāo na uñgliyāñ sāhab

gumāñ yaqīñ meñ yaqīnan badal bhī saktā hai

pahāḌ apnī qadāmat pe yuuñ na itrā.eñ

ubhar gayā koī zarra nigal bhī saktā hai

mire laboñ pe jamī barf soch kar chhūnā

tumhāre jism kā aahan pighal bhī saktā hai

koī asā bhī nahīñ aur hai akelā tū

amīr-e-shahr kā azhdar nigal bhī saktā hai

hamāre saath jo chalnā hai zād-e-rah le lo

kaThin se moḌ haiñ paañv phisal bhī saktā hai

karo na zid ki kisī shahr kī taraf jā.ūñ

mire aziiz ye dil hai machal bhī saktā hai

kar apne saa.e se rāz-o-niyāz kī bāteñ

bahut udaas hai lekin bahal bhī saktā hai

bas ik nazar jo karam kī vo us taraf phere

qadam bahak jo gayā hai sambhal bhī saktā hai

shuur-o-fikr se aage nikal bhi sakta hai

mera junun hawaon pe chal bhi sakta hai

mere guman pe uThao na ungliyan sahab

guman yaqin mein yaqinan badal bhi sakta hai

pahaD apni qadamat pe yun na itraen

ubhar gaya koi zarra nigal bhi sakta hai

mere labon pe jami barf soch kar chhuna

tumhaare jism ka aahan pighal bhi sakta hai

koi asa bhi nahin aur hai akela tu

amir-e-shahr ka azhdar nigal bhi sakta hai

hamare sath jo chalna hai zad-e-rah le lo

kaThin se moD hain panw phisal bhi sakta hai

karo na zid ki kisi shahr ki taraf jaun

mere aziz ye dil hai machal bhi sakta hai

kar apne sae se raaz-o-niyaz ki baaten

bahut udas hai lekin bahal bhi sakta hai

bas ek nazar jo karam ki wo us taraf phere

qadam bahak jo gaya hai sambhal bhi sakta hai