sirf bayaban bachta hum mein bilkul jangal ho jate

sirf bayābāñ bachtā ham meñ bilkul jangal ho jaate

she'r na kahte to ham shāyad ab tak pāgal ho jaate

ham ne vaqt pe jī bhar ro kar ḳhud ko tāza-dam rakkhā

aañsū andar rakkhe rahte to ham bojhal ho jaate

sunte haiñ ham tum ko chhūkar ḳhushbū aane lagtī hai

kaash hamāre shāne lagte ham bhī sandal ho jaate

tum se ham ko milnā hī thā har sūrat har hālat meñ

tum parbat ban jaate to ham jal kar bādal ho jaate

shukr hai kuchh mīnāroñ ko tum ne yak-laḳht nahīñ Dhāyā

itnī dhuul uḌī hotī sab dariyā daldal ho jaate

kaash mire misroñ se bilkul us kī āñkheñ ban jātīñ

kaash mire alfāz kisī kī aañkh kā kājal ho jaate

ḳhāliq ne saarā sarmāyā Daal diyā ik chehre meñ

itnī raunaq se to donoñ 'ālam ajmal ho jaate

sirf bayaban bachta hum mein bilkul jangal ho jate

she'r na kahte to hum shayad ab tak pagal ho jate

hum ne waqt pe ji bhar ro kar KHud ko taza-dam rakkha

aansu andar rakkhe rahte to hum bojhal ho jate

sunte hain hum tum ko chhukar KHushbu aane lagti hai

kash hamare shane lagte hum bhi sandal ho jate

tum se hum ko milna hi tha har surat har haalat mein

tum parbat ban jate to hum jal kar baadal ho jate

shukr hai kuchh minaron ko tum ne yak-laKHt nahin Dhaya

itni dhul uDi hoti sab dariya daldal ho jate

kash mere misron se bilkul us ki aankhen ban jatin

kash mere alfaz kisi ki aankh ka kajal ho jate

KHaliq ne sara sarmaya Dal diya ek chehre mein

itni raunaq se to donon 'alam ajmal ho jate