صرف اک اس کے خفا ہونے سے

صرف اک اس کے خفا ہونے سے

مجھ کو مطلب نہ رہا ہونے سے

زندگی موت سے مل پاتی نہیں

بیچ میں ایک خلا ہونے سے

شام بکھری ہے مرے دل کی طرح

تیری زلفوں کی ہوا ہونے سے

دل تو یوں راہ پہ آنے سے رہا

چار چھ دن کی سزا ہونے سے

کیا بگڑ جاتا ہے تیرا مرے یار

ہم غریبوں کا بھلا ہونے سے

اب بھی بندوں میں چھپے بیٹھے ہو

کیا ملا تم کو خدا ہونے سے

کیسی بھرپور عبادت کی ہے

کچھ نمازوں کے قضا ہونے سے

جگمگا اٹھتا ہے کمرا سارا

صورت آئینہ نما ہونے سے