sitam tir-e-nigah-e-dilruba tha

sitam tīr-e-nigāh-e-dilrubā thā

hamāre haq meñ paiġhām-e-qazā thā

huā achchhā ki vo ghar se na nikle

kise mā'lūm kis ke dil meñ kyā thā

mujhe vo yaad karte haiñ ye kah kar

ḳhudā baḳhshe nihāyat bā-vafā thā

umīd-e-vasl kī hālat na pūchho

faqat ik aasrā hī aasrā thā

bahut achchhā huā vo le ga.e dil

baḌā ziddī nihāyat bevafā thā

nahīñ mā'lūm us kam-sin ko ye bhī

hamāre dil meñ kyā hai aur kyā thā

na pūchho jalva-gāh-e-nāz kā jamāl

har ik mahv-e-jamāl-e-dilrubā thā

sunā hai mai-kashī karne lagā 'hijr'

vo mard-e-bā-ḳhudā to pārsā thā

sitam tir-e-nigah-e-dilruba tha

hamare haq mein paigham-e-qaza tha

hua achchha ki wo ghar se na nikle

kise ma'lum kis ke dil mein kya tha

mujhe wo yaad karte hain ye kah kar

KHuda baKHshe nihayat ba-wafa tha

umid-e-wasl ki haalat na puchho

faqat ek aasra hi aasra tha

bahut achchha hua wo le gae dil

baDa ziddi nihayat bewafa tha

nahin ma'lum us kam-sin ko ye bhi

hamare dil mein kya hai aur kya tha

na puchho jalwa-gah-e-naz ka jamal

har ek mahw-e-jamal-e-dilruba tha

suna hai mai-kashi karne laga 'hijr'

wo mard-e-ba-KHuda to parsa tha