siyah rang darichon mein bhar gaya ek shaKHs

siyāh rang darīchoñ meñ bhar gayā ik shaḳhs

abhī makān kī chhat se utar gayā ik shaḳhs

tamām shahr meñ parchhā.iyoñ kā gherā hai

ufuq kī raushniyoñ meñ bikhar gayā ik shaḳhs

badan se jhaḌtī huī raakh kā surāġh na pūchh

hamāre jism ke andar hī mar gayā ik shaḳhs

badan ḳhalā meñ mu'allaq dikhā.ī detā hai

dil-o-dimāġh pe jaadū sā kar gayā ik shaḳhs

vo abr thā to sarāboñ hī pe barastā rahā

banā jo dhuup to barbād kar gayā ik shaḳhs

phalāñg kar alam-o-yās ke nasheb-o-farāz

udāsiyoñ ke nagar se guzar gayā ik shaḳhs

kamāl ye hai ki peḌoñ kī saa.eñ saa.eñ meñ 'shād'

ḳhud apne qadmoñ kī aahaT se Dar gayā ik shaḳhs

siyah rang darichon mein bhar gaya ek shaKHs

abhi makan ki chhat se utar gaya ek shaKHs

tamam shahr mein parchhaiyon ka ghera hai

ufuq ki raushniyon mein bikhar gaya ek shaKHs

badan se jhaDti hui rakh ka suragh na puchh

hamare jism ke andar hi mar gaya ek shaKHs

badan KHala mein mu'allaq dikhai deta hai

dil-o-dimagh pe jadu sa kar gaya ek shaKHs

wo abr tha to sarabon hi pe barasta raha

bana jo dhup to barbaad kar gaya ek shaKHs

phalang kar alam-o-yas ke nasheb-o-faraaz

udasiyon ke nagar se guzar gaya ek shaKHs

kamal ye hai ki peDon ki saen saen mein 'shad'

KHud apne qadmon ki aahaT se Dar gaya ek shaKHs