siyahi girti rahe aur diya KHarab na ho

siyāhī girtī rahe aur diyā ḳharāb na ho

ye tāq-e-chashm ab itnā bhī kyā ḳharāb na ho

har aane vaalā isī tarah se tujhe chāhe

mirī banā.ī huī ye fazā ḳharāb na ho

azal abad meñ Thanī hai so maiñ nikaltā huuñ

mirī kaḌī se tirā silsila ḳharāb na ho

ham us havā se to kahte haiñ kyuuñ bujhāyā charāġh

kahīñ charāġh kī apnī havā ḳharāb na ho

maiñ apnī shart pe aayā thā is ḳharābe meñ

so mere saath koī dūsrā ḳharāb na ho

mirī ḳharābī ko yakjā karo kahīñ na kahīñ

mirā muāmla ab jā-ba-jā ḳharāb na ho

ḳharāb huuñ bhale is ishtihā meñ ham aur tum

par ek dūsre kā zā.iqa ḳharāb na ho

siyahi girti rahe aur diya KHarab na ho

ye taq-e-chashm ab itna bhi kya KHarab na ho

har aane wala isi tarah se tujhe chahe

meri banai hui ye faza KHarab na ho

azal abad mein Thani hai so main nikalta hun

meri kaDi se tera silsila KHarab na ho

hum us hawa se to kahte hain kyun bujhaya charagh

kahin charagh ki apni hawa KHarab na ho

main apni shart pe aaya tha is KHarabe mein

so mere sath koi dusra KHarab na ho

meri KHarabi ko yakja karo kahin na kahin

mera muamla ab ja-ba-ja KHarab na ho

KHarab hun bhale is ishtiha mein hum aur tum

par ek dusre ka zaiqa KHarab na ho