سیاہ کار سیہ رو خطا شعار آیا

شاد عظیم آبادی

سیاہ کار سیہ رو خطا شعار آیا

شاد عظیم آبادی

MORE BYشاد عظیم آبادی

    سیاہ کار سیہ رو خطا شعار آیا

    تری جناب میں تیرا گناہ گار آیا

    خزاں کا دور گیا موسم بہار آیا

    مگر نہ اس دل بے صبر کو قرار آیا

    کہیں جواب نہ تو نے دیا یہاں کے سوا

    جہاں میں یوں تو بہت میں تجھے پکار آیا

    سرائے دہر میں چھوڑا تن کثیف اپنا

    یہ بوجھ سر سے مسافر ترا اتار آیا

    ہمارے نالۂ دل کا نہ پوچھئے احوال

    گلی سے یار کی ہمت بھی اب کے ہار آیا

    پڑی جو قیس کے اوپر نظر بیاباں میں

    مجھے غریب کے اوپر غضب کا پیار آیا

    نہ اپنے پاؤں سے آنا ملا گلی میں تری

    یہاں بھی چار کے کاندھوں پہ میں سوار آیا

    یہ اضطراب ہے کیوں ہے کدھر کا قصد اے روح

    کہاں سے آئی طلب کس جگہ سے تار آیا

    برا خزاں کا ہو دیکھے جو سوکھے سوکھے ہونٹ

    غریب پھول پہ مجھ کو غضب کا پیار آیا

    مری نہ پوچھ کہ تیری گلی میں خاک ہوں میں

    تجھی کو میری وفا کا نہ اعتبار آیا

    لحد نے کھول کے آغوش دی جگہ جو مجھے

    لپٹ کے رہ گئے ہم کو بھی خوب پیار آیا

    یقین جان لے ساقی کہ خم کی خیر نہیں

    خدا نہ کردہ جو اب کے مجھے خمار آیا

    مرے نصیب کہاں اس طرح کے دیدۂ تر

    سنوں یہ خوش خبری کان سے کہ یار آیا

    نگہ نے ان کی جہاں صید نو کو تاک لیا

    ادا نے ان کی کہا لے نیا شکار آیا

    ترے فراق کے خوگر نہ مر مٹے جب تک

    قضا کے آنے کا تب تک نہ اعتبار آیا

    دلا پلٹ گیا قسمت کا پہلے ہی پاسا

    اب اپنی جیت کہاں دل جب اپنا ہار آیا

    جب اختیار چمن پر نہیں تو ہم کو کیا

    ہزار بار اگر موسم بہار آیا

    شکایت دل مضطر کہاں تلک اے موت

    دعائیں دوں گا تجھے گر اسے قرار آیا

    جواب خط کا نہ قاصد سے ماجرا پوچھو

    ہے صاف چہرہ سے ظاہر کہ شرمسار آیا

    نظر میں پھر گئی چال آپ کی جوانی کی

    جو لڑکھڑاتا ہوا کوئی بادہ خوار آیا

    جو مانگتے تو ہمیں باغباں سے کیا ملتا

    غریب پھول تو دامن کو بھی پسار آیا

    نہ اپنے نالۂ دل کو ملا جواب کہیں

    نکل کے دل سے تجھے عرش تک پکار آیا

    عدم میں شادؔ کو کیا ولولہ ہو جنت کا

    کہ یہ غریب تو ہستی سے دل کو مار آیا

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY