soch kar bhi kya jaana jaan kar bhi kya paya

soch kar bhī kyā jaanā jaan kar bhī kyā paayā

jab bhī ā.īna dekhā ḳhud ko dūsrā paayā

hoñT par diyā rakhnā dil-jaloñ kī shoḳhī hai

varna is andhere meñ kaun muskurā paayā

bol the divānoñ ke jin se hosh vāloñ ne

soch ke dhuñdlakoñ meñ apnā rāsta paayā

ehtimām dastak kā apnī vaz.a thī varna

ham ne dar rasā.ī kā bār-hā khulā paayā

falsafoñ ke dhāgoñ se khīñch kar sirā dil kā

vahm se haqīqat tak ham ne silsila paayā

umr yā zamāne kā khel hai bahāne kā

sab ne mājrā dekhā kis ne mudda.ā paayā

shā.erī talab apnī shā.erī atā us kī

hausle se kam māñgā zarf se sivā paayā

'sāz' jab khulā ham par sher koī 'ġhālib' kā

ham ne goyā bātin kā ik surāġh sā paayā

soch kar bhi kya jaana jaan kar bhi kya paya

jab bhi aaina dekha KHud ko dusra paya

honT par diya rakhna dil-jalon ki shoKHi hai

warna is andhere mein kaun muskura paya

bol the diwanon ke jin se hosh walon ne

soch ke dhundlakon mein apna rasta paya

ehtimam dastak ka apni waza thi warna

hum ne dar rasai ka bar-ha khula paya

falsafon ke dhagon se khinch kar sira dil ka

wahm se haqiqat tak hum ne silsila paya

umr ya zamane ka khel hai bahane ka

sab ne majra dekha kis ne muddaa paya

shaeri talab apni shaeri ata us ki

hausle se kam manga zarf se siwa paya

'saz' jab khula hum par sher koi 'ghaalib' ka

hum ne goya baatin ka ek suragh sa paya