sochta hun ki aadmi kya hai

sochtā huuñ ki aadmī kyā hai

ġham hai kyā chiiz aur ḳhushī kyā hai

uljhe uljhe ye log kaise haiñ

bikhrī bikhrī ye zindagī kyā hai

tum mile ho to mujh pe raaz khulā

tīrgī kyā thī raushnī kyā hai

vo girā de anā kī dīvāreñ

us se phir apnī dushmanī kyā hai

chāñd meñ bhī hai aks sūraj kā

ham samajhte haiñ chāñdnī kyā hai

jo samundar se tishna-lab aa.e

us se pūchho ki tishnagī kyā hai

zindagī sirf ḳhvāb kā aalam

āgahī kyā hai be-ḳhudī kyā hai

jis ko sajde kiye farishtoñ ne

sochiye ab vo aadmī kyā hai

Dhal gayā hai shu.ūr lafzoñ meñ

kyā batā.ūñ ki shā.erī kyā hai

merī mushkil to aap hī sāhib

aap kahiye ki aap kī kyā hai

merī yādoñ ke mā-sivā bolo

aap ke dil meñ aur bhī kyā hai

aap miliye 'rafī.a' se ik din

phir ye dekheñ ki dostī kyā hai

sochta hun ki aadmi kya hai

gham hai kya chiz aur KHushi kya hai

uljhe uljhe ye log kaise hain

bikhri bikhri ye zindagi kya hai

tum mile ho to mujh pe raaz khula

tirgi kya thi raushni kya hai

wo gira de ana ki diwaren

us se phir apni dushmani kya hai

chand mein bhi hai aks suraj ka

hum samajhte hain chandni kya hai

jo samundar se tishna-lab aae

us se puchho ki tishnagi kya hai

zindagi sirf KHwab ka aalam

aagahi kya hai be-KHudi kya hai

jis ko sajde kiye farishton ne

sochiye ab wo aadmi kya hai

Dhal gaya hai shuur lafzon mein

kya bataun ki shaeri kya hai

meri mushkil to aap hi sahib

aap kahiye ki aap ki kya hai

meri yaadon ke ma-siwa bolo

aap ke dil mein aur bhi kya hai

aap miliye 'rafia' se ek din

phir ye dekhen ki dosti kya hai