sochta to main bhi hun guftar apni rok lun

sochtā to maiñ bhī huuñ guftār apnī rok luuñ

par ye mumkin hī nahīñ raftār apnī rok luuñ

koī kah de haq-parastī kā taqāzā hai yahī

sāmne bātil ho aur talvār apnī rok luuñ

tujh se luuñ apnī zabūñ-hālī kā phir ik ik hisāb

pahle girne se zarā dastār apnī rok luuñ

ḳhud hī ho jā.egī qaa.em pyaar ulfat kī fazā

bas zarā ik aapsī takrār apnī rok luuñ

TuuT jaa.e us kā ik pal meñ jama-ḳhorī kā ḳhvāb

kuchh dinoñ tak maiñ jo paidāvār apnī rok luuñ

māl-o-zar jāh-o-hasham sab ko to ruḳhsat kar diyā

aa tujhe ai ġhairat-e-fankār apnī rok luuñ

sochta to main bhi hun guftar apni rok lun

par ye mumkin hi nahin raftar apni rok lun

koi kah de haq-parasti ka taqaza hai yahi

samne baatil ho aur talwar apni rok lun

tujh se lun apni zabun-haali ka phir ek ek hisab

pahle girne se zara dastar apni rok lun

KHud hi ho jaegi qaem pyar ulfat ki faza

bas zara ek aapsi takrar apni rok lun

TuT jae us ka ek pal mein jama-KHori ka KHwab

kuchh dinon tak main jo paidawar apni rok lun

mal-o-zar jah-o-hasham sab ko to ruKHsat kar diya

aa tujhe ai ghairat-e-fankar apni rok lun