سوچتا تو میں بھی ہوں گفتار اپنی روک لوں

سوچتا تو میں بھی ہوں گفتار اپنی روک لوں

پر یہ ممکن ہی نہیں رفتار اپنی روک لوں

کوئی کہہ دے حق پرستی کا تقاضا ہے یہی

سامنے باطل ہو اور تلوار اپنی روک لوں

تجھ سے لوں اپنی زبوں حالی کا پھر اک اک حساب

پہلے گرنے سے ذرا دستار اپنی روک لوں

خود ہی ہو جائے گی قائم پیار الفت کی فضا

بس ذرا اک آپسی تکرار اپنی روک لوں

ٹوٹ جائے اس کا اک پل میں جمع خوری کا خواب

کچھ دنوں تک میں جو پیداوار اپنی روک لوں

مال و زر جاہ و حشم سب کو تو رخصت کر دیا

آ تجھے اے غیرت فنکار اپنی روک لوں