subh-e-bahaar-o-sham-e-KHizan kuchh na kuchh to ho

sub.h-e-bahār-o-shām-e-ḳhizāñ kuchh na kuchh to ho

be-nām zindagī kā nishāñ kuchh na kuchh to ho

ḳhāmoshiyoñ kī aag meñ jaltā hai mai-kada

dil-dādgān-e-sho.ala-ruḳhāñ kuchh na kuchh to ho

jiine ke vāste koī sūrat to chāhiye

ho sham-e-anjuman ki dhuāñ kuchh na kuchh to ho

chup chup hai mauj aur kināre udaas haiñ

ai zindagī ke sail-e-ravāñ kuchh na kuchh to ho

sub.h-e-azal kā ruup ki shām-e-abad kā giit

saaya ho dhuup ho ki gumāñ kuchh na kuchh to ho

saaqī na.e charāġh mubārak tujhe magar

jo bujh chuke haiñ un kā bayāñ kuchh na kuchh to ho

koī hasīn giit koī ras-bharī ġhazal

yaaro ilāj-e-ġham-zadgāñ kuchh na kuchh to ho

maanā ki 'tāb' yuuñ bhī guzar jā.egī magar

zikr-e-jamāl-e-gul-badnāñ kuchh na kuchh to ho

subh-e-bahaar-o-sham-e-KHizan kuchh na kuchh to ho

be-nam zindagi ka nishan kuchh na kuchh to ho

KHamoshiyon ki aag mein jalta hai mai-kada

dil-dadgan-e-shoala-ruKHan kuchh na kuchh to ho

jine ke waste koi surat to chahiye

ho sham-e-anjuman ki dhuan kuchh na kuchh to ho

chup chup hai mauj aur kinare udas hain

ai zindagi ke sail-e-rawan kuchh na kuchh to ho

subh-e-azal ka rup ki sham-e-abad ka git

saya ho dhup ho ki guman kuchh na kuchh to ho

saqi nae charagh mubarak tujhe magar

jo bujh chuke hain un ka bayan kuchh na kuchh to ho

koi hasin git koi ras-bhari ghazal

yaro ilaj-e-gham-zadgan kuchh na kuchh to ho

mana ki 'tab' yun bhi guzar jaegi magar

zikr-e-jamal-e-gul-badnan kuchh na kuchh to ho