صبح حسیں لکھوں کہ جواں شام کیا لکھوں

صبح حسیں لکھوں کہ جواں شام کیا لکھوں

اے زندگی بتا کہ ترا نام کیا لکھوں

مدت سے سوچتا ہوں لکھوں کوئی خط تجھے

پھر یہ بھی سوچتا ہوں کہ پیغام کیا لکھوں

اس دل کی دھڑکنوں پہ ترے نام کے سوا

تو ہی بتا کہ اور کوئی نام کیا لکھوں

بے نام چاہتوں کا سفر تو نظر میں ہے

حیراں ہوں اس تلاش کا انجام کیا لکھوں

تیرے بغیر کیا ہے مری زندگی کا حال

کیسے ہیں میرے گھر کے در و بام کیا لکھوں

کچھ تو بتا رفیعؔ کہ اس زندگی کو میں

چاہت لکھوں کہ چاہت ناکام کیا لکھوں