subh-e-KHandan ki tarah lauh-o-qalam jage hain

sub.h-e-ḳhandāñ kī tarah lauh-o-qalam jaage haiñ

jab tirī zulf ke ḳham se mire ġham jaage haiñ

bād-e-shab mausam-e-ḳhush-rang kī sā'at aa.ī

jaao saaqī ko bulā laao ki ham jaage haiñ

bārhā aisā huā hai ki bajā.e mere

merī āñkhoñ ne batāyā hai ki ham jaage haiñ

kaise kaise mirī turbat pe lage haiñ mele

mar gayā maiñ to mire ahl-e-karam jaage haiñ

hañs rahe haiñ jo mujhe dekh kar ahl-e-duniyā

uf ye rātoñ ko mujhe lagtā hai kam jaage haiñ

ye haqīqat bhī mire baa'd na hogī shāyad

saiñkaḌoñ hashr tire zer-e-qadam jaage haiñ

'ishq vāloñ ke machalte hue sajdoñ kī qasam

ahl-e-kā’ba ko ḳhabar do ki sanam jaage haiñ

aisā kuchh mujh ko batāte haiñ zamāne vaale

ahl-e-ġham bāñdhne ulfat kā bharam jaage haiñ

ab mudāvā-e-ġham-e-dil tirā hone se rahā

har taraf 'manzil'-e-bīmār sitam jaage haiñ

subh-e-KHandan ki tarah lauh-o-qalam jage hain

jab teri zulf ke KHam se mere gham jage hain

baad-e-shab mausam-e-KHush-rang ki sa'at aai

jao saqi ko bula lao ki hum jage hain

barha aisa hua hai ki bajae mere

meri aankhon ne bataya hai ki hum jage hain

kaise kaise meri turbat pe lage hain mele

mar gaya main to mere ahl-e-karam jage hain

hans rahe hain jo mujhe dekh kar ahl-e-duniya

uf ye raaton ko mujhe lagta hai kam jage hain

ye haqiqat bhi mere ba'd na hogi shayad

sainkaDon hashr tere zer-e-qadam jage hain

'ishq walon ke machalte hue sajdon ki qasam

ahl-e-ka’ba ko KHabar do ki sanam jage hain

aisa kuchh mujh ko batate hain zamane wale

ahl-e-gham bandhne ulfat ka bharam jage hain

ab mudawa-e-gham-e-dil tera hone se raha

har taraf 'manzil'-e-bimar sitam jage hain