صبح خنداں کی طرح لوح و قلم جاگے ہیں

صبح خنداں کی طرح لوح و قلم جاگے ہیں

جب تری زلف کے خم سے مرے غم جاگے ہیں

بعد شب موسم خوش رنگ کی ساعت آئی

جاؤ ساقی کو بلا لاؤ کہ ہم جاگے ہیں

بارہا ایسا ہوا ہے کہ بجائے میرے

میری آنکھوں نے بتایا ہے کہ ہم جاگے ہیں

کیسے کیسے مری تربت پہ لگے ہیں میلے

مر گیا میں تو مرے اہل کرم جاگے ہیں

ہنس رہے ہیں جو مجھے دیکھ کر اہل دنیا

اف یہ راتوں کو مجھے لگتا ہے کم جاگے ہیں

یہ حقیقت بھی مرے بعد نہ ہوگی شاید

سینکڑوں حشر ترے زیر قدم جاگے ہیں

عشق والوں کے مچلتے ہوئے سجدوں کی قسم

اہل کعبہ کو خبر دو کہ صنم جاگے ہیں

ایسا کچھ مجھ کو بتاتے ہیں زمانے والے

اہل غم باندھنے الفت کا بھرم جاگے ہیں

اب مداوائے غم دل ترا ہونے سے رہا

ہر طرف منزلؔ بیمار ستم جاگے ہیں