subh hai parda tere chehre se haT jaane ka nam

sub.h hai parda tire chehre se haT jaane kā naam

shaam hai gesū tire ruḳh par bikhar jaane kā naam

jis ne dekhā ik nazar sarshār-o-be-ḳhud ho gayā

chashm-e-maigūñ rakh diyā labrez paimāne kā naam

tere aane se bahār aa.ī hai bazm-e-dahr meñ

aur qayāmat hai tire aa kar chale jaane kā naam

zindagī hai asl meñ milne kī paiham kashmakash

maut hai us markaz-e-aslī meñ mil jaane kā naam

aadmī is jism ke miTne se miT saktā nahīñ

maut aanā hai faqat mahfil badal jaane kā naam

mutma.in insān is duniyā meñ ho saktā nahīñ

mutma.in honā hai kuchh din ko bahal jaane kā naam

ek tabassum ke ivaz ronā paḌā pahroñ mujhe

ab to letī hī nahīñ lab par hañsī aane kā naam

ek jām-e-be-ḳhudī 'najma' ko saaqī baḳhsh de

tā-abad raushan rahegā tere maiḳhāne kā naam

subh hai parda tere chehre se haT jaane ka nam

sham hai gesu tere ruKH par bikhar jaane ka nam

jis ne dekha ek nazar sarshaar-o-be-KHud ho gaya

chashm-e-maigun rakh diya labrez paimane ka nam

tere aane se bahaar aai hai bazm-e-dahr mein

aur qayamat hai tere aa kar chale jaane ka nam

zindagi hai asl mein milne ki paiham kashmakash

maut hai us markaz-e-asli mein mil jaane ka nam

aadmi is jism ke miTne se miT sakta nahin

maut aana hai faqat mahfil badal jaane ka nam

mutmain insan is duniya mein ho sakta nahin

mutmain hona hai kuchh din ko bahal jaane ka nam

ek tabassum ke iwaz rona paDa pahron mujhe

ab to leti hi nahin lab par hansi aane ka nam

ek jam-e-be-KHudi 'najma' ko saqi baKHsh de

ta-abad raushan rahega tere maiKHane ka nam