subh har ujale pe raat ka guman kyun hai

sub.h har ujāle pe raat kā gumāñ kyuuñ hai

jal rahī hai kyā dhartī arsh pe dhuāñ kyuuñ hai

ḳhanjaroñ kī sāzish par kab talak ye ḳhāmoshī

ruuh kyuuñ hai yaḳh-basta naġhma be-zabāñ kyuuñ hai

rāsta nahīñ chalte sirf ḳhaak uḌāte haiñ

kārvāñ se bhī aage gard-e-kārvāñ kyuuñ hai

kuchh kamī nahīñ lekin koī kuchh to batlāo

ishq is sitamgar kā shauq kā ziyāñ kyuuñ hai

ham to ghar se nikle the jītne ko dil sab kā

teġh haath meñ kyuuñ hai dosh par kamāñ kyuuñ hai

ye hai bazm-e-mai-noshī is meñ sab barābar haiñ

phir hisāb-e-sāqī meñ suud kyuuñ ziyāñ kyuuñ hai

den kis nigah kī hai kin laboñ kī barakat hai

tum meñ 'ja.afarī' itnī shoḳhī-e-bayāñ kyuuñ hai

subh har ujale pe raat ka guman kyun hai

jal rahi hai kya dharti arsh pe dhuan kyun hai

KHanjaron ki sazish par kab talak ye KHamoshi

ruh kyun hai yaKH-basta naghma be-zaban kyun hai

rasta nahin chalte sirf KHak uDate hain

karwan se bhi aage gard-e-karwan kyun hai

kuchh kami nahin lekin koi kuchh to batlao

ishq is sitamgar ka shauq ka ziyan kyun hai

hum to ghar se nikle the jitne ko dil sab ka

tegh hath mein kyun hai dosh par kaman kyun hai

ye hai bazm-e-mai-noshi is mein sab barabar hain

phir hisab-e-saqi mein sud kyun ziyan kyun hai

den kis nigah ki hai kin labon ki barakat hai

tum mein 'jafari' itni shoKHi-e-bayan kyun hai