subh ko tar kiya gaya sham ko nam kiya gaya

sub.h ko tar kiyā gayā shaam ko nam kiyā gayā

tab kahīñ ḳhush huā gayā tab kahīñ ġham kiyā gayā

ḳhvāb ke TūTne pe aaj karnā paḌā hai ehtijāj

bolnā kam kiyā gayā dekhnā kam kiyā gayā

kaam pe bhejne se qabl ham pe huā bahut sā kaam

ham ko badan kiyā gayā ham ko qadam kiyā gayā

mujh ko batā diyā gayā zindagī kyā hai maut kyā

mere badan se ek aur ruuh ko kam kiyā gayā

samtoñ kā is qadar ḳhayāl samtoñ kā is qadar malāl

chāroñ ke biich baiTh kar chāroñ kā ġham kiyā gayā

vasl rahā na tum rahe hijr rahā na ham rahe

tum ko vo tum kiyā gayā ham ko vo ham kiyā gayā

ham ko uThā liyā gayā ḳhauf tak aur ḳhvāb tak

patte baḌhā diye ga.e phūloñ ko kam kiyā gayā

mere varaq pe ek aur buuñd girī lahū kī buuñd

mere qalam se ek aur sar ko qalam kiyā gayā

subh ko tar kiya gaya sham ko nam kiya gaya

tab kahin KHush hua gaya tab kahin gham kiya gaya

KHwab ke TuTne pe aaj karna paDa hai ehtijaj

bolna kam kiya gaya dekhna kam kiya gaya

kaam pe bhejne se qabl hum pe hua bahut sa kaam

hum ko badan kiya gaya hum ko qadam kiya gaya

mujh ko bata diya gaya zindagi kya hai maut kya

mere badan se ek aur ruh ko kam kiya gaya

samton ka is qadar KHayal samton ka is qadar malal

chaaron ke bich baiTh kar chaaron ka gham kiya gaya

wasl raha na tum rahe hijr raha na hum rahe

tum ko wo tum kiya gaya hum ko wo hum kiya gaya

hum ko uTha liya gaya KHauf tak aur KHwab tak

patte baDha diye gae phulon ko kam kiya gaya

mere waraq pe ek aur bund giri lahu ki bund

mere qalam se ek aur sar ko qalam kiya gaya