subh phir chhoD ke jaane ko thi ek bar mujhe

sub.h phir chhoḌ ke jaane ko thī ik baar mujhe

us ne bar-vaqt kiyā ḳhvāb se bedār mujhe

ek dīvār ko tasvīr samajhtā rahā maiñ

aur tasvīr samajhtī rahī dīvār mujhe

maiñ to ik 'umr se masrūf isī kaam meñ huuñ

jo samajhtā hai samajhtā rahe bekār mujhe

kyā batā.ūñ ki 'ajab hai mirā shauq-e-tā’mīr

jo shab-o-roz kiye jaatā hai mismār mujhe

maiñ to chup-chāp kahānī se nikal jā.ūñ magar

rok letā hai hamesha mirā kirdār mujhe

zalzale aate rahe ghar nahīñ chhoḌā lekin

mashvare dete rahe go dar-o-dīvār mujhe

maiñ ki jis din se huā chhāñv kā 'aadī 'ġhā.er'

bas usī din se hai ye dhuup kā āzār mujhe

subh phir chhoD ke jaane ko thi ek bar mujhe

us ne bar-waqt kiya KHwab se bedar mujhe

ek diwar ko taswir samajhta raha main

aur taswir samajhti rahi diwar mujhe

main to ek 'umr se masruf isi kaam mein hun

jo samajhta hai samajhta rahe bekar mujhe

kya bataun ki 'ajab hai mera shauq-e-ta’mir

jo shab-o-roz kiye jata hai mismar mujhe

main to chup-chap kahani se nikal jaun magar

rok leta hai hamesha mera kirdar mujhe

zalzale aate rahe ghar nahin chhoDa lekin

mashware dete rahe go dar-o-diwar mujhe

main ki jis din se hua chhanw ka 'adi 'ghaer'

bas usi din se hai ye dhup ka aazar mujhe