suKHan kuchh aise lahu ke labon se nikle hain

suḳhan kuchh aise lahū ke laboñ se nikle haiñ

ḳhud-āgahī meñ ham apnī hadoñ se nikle haiñ

koī batāo ye nairangī-e-numū kyā hai

chubhe jo paañv meñ kāñTe saroñ se nikle haiñ

ye dhuup aisī ki ham naqsh jis pe nām-ba-nām

ye dasht vo haiñ jo apne gharoñ se nikle haiñ

ham aur mehvar-e-jāñ kā ye daur ḳhāk-ba-ḳhāk

sitāra-gar bhī kabhī gardishoñ se nikle haiñ

shabīh-gar haiñ kuchh aise ki ham barūn-e-badan

bas ek zau ko liye sau ruḳhoñ se nikle haiñ

ye tah-ba-tah jo zamāne zamīñ ke andar haiñ

sañvar sañvar ke ham in kī safoñ se nikle haiñ

suKHan kuchh aise lahu ke labon se nikle hain

KHud-agahi mein hum apni hadon se nikle hain

koi batao ye nairangi-e-numu kya hai

chubhe jo panw mein kanTe saron se nikle hain

ye dhup aisi ki hum naqsh jis pe nam-ba-nam

ye dasht wo hain jo apne gharon se nikle hain

hum aur mehwar-e-jaan ka ye daur KHak-ba-KHak

sitara-gar bhi kabhi gardishon se nikle hain

shabih-gar hain kuchh aise ki hum barun-e-badan

bas ek zau ko liye sau ruKHon se nikle hain

ye tah-ba-tah jo zamane zamin ke andar hain

sanwar sanwar ke hum in ki safon se nikle hain