سکوں کی چھاؤں میں جلنے کا ماجرا ہے عجیب

سکوں کی چھاؤں میں جلنے کا ماجرا ہے عجیب

ہمارے دل کا بھی لوگو معاملہ ہے عجیب

بتا اے پیکر لمحات کچھ ہوا ہے عجیب

نہ روشنی نہ اندھیرا تری قبا ہے عجیب

تری زمیں تو ہے بے محوری کی سمت رواں

ترا سفر ہو سلامت کہ راستہ ہے عجیب

کہیں بھی جنبش یک لمحہ تک کا نام نہیں

دیار دل کا تو اس بار زلزلہ ہے عجیب

کوئی تو دے مری آنکھوں کو نیند کی سوغات

یہاں تو جاگتی راتوں کا سلسلہ ہے عجیب

قرار قلب بھی ڈھونڈیں تو کس لئے ڈھونڈیں

قرار قلب سے آگے کا راستہ ہے عجیب

نجات اب تری ممکن نہیں کہیں بھی شعیبؔ

ہجوم درد کا اب کے محاصرہ ہے عجیب