سکوت شب میں فلک سے مماثلت کے لئے
سکوت شب میں فلک سے مماثلت کے لئے
سیاہ رنگ چنا خواب گہ کی چھت کے لئے
جو لوگ روتے نہیں ہیں بکھرنے لگتے ہیں
بہت ضروری ہے نم خاک کی جڑت کے لئے
دکھا رہے ہیں وہ خفیہ سرنگیں فاتح کو
محل میں چھوڑا تھا جن کو مزاحمت کے لئے
نہ پوچھ مجھ سے تجھے مخلصانہ مشورہ ہے
میں ٹھیک شخص نہیں ہوں مشاورت کے لئے
نہ بول چال کا حصہ ہیں اب نہ حافظوں کا
ہم ایسے ترک شدہ لفظ ہیں لغت کے لئے
زبانی عہد ہوا اور لبوں سے مہر لگی
ملا نہ جلدی میں جب کچھ لکھت پڑھت کے لئے
تمام عمر بری کی ہے اپنے ساتھ عمیرؔ
کوئی طریقہ بتا خود سے معذرت کے لئے
مأخذ :
- کتاب : آخری تصویر (Pg. 91)
- Author : عمیر نجمی
- مطبع : ریختہ پبلی کیشنز (2024)
- اشاعت : First
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
