sun le ye iltimas mera dostana hai

sun le ye iltimās mirā dostāna hai

hushiyār ho ki tīr-e-ajal kā nishāna hai

kab tak rahegī masnad-e-kam-ḳhvāb zer-e-pā

kaahe ḳhamīda yaar tirā shāmiyāna hai

duniyā ke maḳhmase haiñ ye farzand-o-aqrabā

begāna sab se ho ki ajal kā yagāna hai

ai andalīb-e-jān-e-chaman jism par na phuul

vīrāna ek roz tirā āshiyāna hai

anfās-e-musta.ār pe kyā e.atibār-e-zīst

ik dam meñ misl-e-mauj-e-sabā to ravāna hai

ye jalva-e-hā-e-bū-qalamūñ be-sabāt haiñ

hai zindagī tilism-e-jahāñ ik fasāna hai

ruktī nahīñ hai baag kisī shahsavār se

har-dam samand-e-umr ko ik tāziyāna hai

kyā sar-kashān-e-dahar ke qisse nahīñ sune

kyā ho ga.e vo log kahāñ vo zamāna hai

kahnā thā jo 'nasīm' tujhe sab sunā chuke

nazdīk iḳhtitām tirā kārḳhāna hai

sun le ye iltimas mera dostana hai

hushiyar ho ki tir-e-ajal ka nishana hai

kab tak rahegi masnad-e-kam-KHwab zer-e-pa

kahe KHamida yar tera shamiyana hai

duniya ke maKHmase hain ye farzand-o-aqraba

begana sab se ho ki ajal ka yagana hai

ai andalib-e-jaan-e-chaman jism par na phul

virana ek roz tera aashiyana hai

anfas-e-mustaar pe kya eatibar-e-zist

ek dam mein misl-e-mauj-e-saba to rawana hai

ye jalwa-e-ha-e-bu-qalamun be-sabaat hain

hai zindagi tilism-e-jahan ek fasana hai

rukti nahin hai bag kisi shahsawar se

har-dam samand-e-umr ko ek taziyana hai

kya sar-kashan-e-dahar ke qisse nahin sune

kya ho gae wo log kahan wo zamana hai

kahna tha jo 'nasim' tujhe sab suna chuke

nazdik iKHtitam tera karKHana hai