sun rakh o KHak mein aashiq ko milane wale

sun rakh o ḳhaak meñ āshiq ko milāne vaale

arsh-e-a.azam ke ye naale haiñ bulāne vaale

ye sadā sunte haiñ us kūche ke jaane vaale

jaan kar jaan na kho kaun hai aane vaale

chain tujh ko bhī na ho mujh ko satāne vaale

tū bhī ThanDā na rahe jī ke jalāne vaale

kab haiñ is dil se butāñ haath uThāne vaale

ye vo kāfir haiñ ki masjid ke haiñ Dhāne vaale

jañg hī gar tujhe manzūr hai phir aañkh laḌā

ye bhī ik jañg hai o aañkh laḌāne vaale

kī to ayyār sī sāzish hai vale ġhuncha-dahan

chuTkiyoñ meñ haiñ ye joban ke uḌāne vaale

un ke hañsne pe na jā un ke hañsāne se na hañs

tere hañsne pe jo hañste haiñ hañsāne vaale

bin-bulā.e tire aa kar tujhe bahkāte haiñ

saḳht nā-ḳhvāñda haiñ ye tujh ko paḌhāne vaale

ashk-e-ḳhūnīñ kī huuñ maiñ sail meñ Duubā rahtā

ye merā rañg hai o paan chabāne vaale

yuuñ gajar sub.h kā jaldī se baje vasl kī raat

are be-rahm are dil ke satāne vaale

guzrī jo mujh pe so guzrī hai na guzrī tujh par

ghaḌī ghaḌiyāl kī ghaḌiyāl bajāne vaale

kyuuñ na un nāloñ ko maiñ pā-e-ba-zanjīr rakhkhūñ

ai junūñ kaun haiñ ye ġhul ke machāne vaale

jab kahā maiñ ne ki sun haal kahā ta.an se ye

tum salāmat raho ahvāl sunāne vaale

paañv ko haath lagāyā tū lagā kahne sarak

tujh ko qurbān karūñ haath lagāne vaale

muttal.a matl.a-e-'ehsāñ' se tū ho rashk-e-qamar

tujh pe āshiq hue paiġhām ke laane vaale

sun rakh o KHak mein aashiq ko milane wale

arsh-e-azam ke ye nale hain bulane wale

ye sada sunte hain us kuche ke jaane wale

jaan kar jaan na kho kaun hai aane wale

chain tujh ko bhi na ho mujh ko satane wale

tu bhi ThanDa na rahe ji ke jalane wale

kab hain is dil se butan hath uThane wale

ye wo kafir hain ki masjid ke hain Dhane wale

jang hi gar tujhe manzur hai phir aankh laDa

ye bhi ek jang hai o aankh laDane wale

ki to ayyar si sazish hai wale ghuncha-dahan

chuTkiyon mein hain ye joban ke uDane wale

un ke hansne pe na ja un ke hansane se na hans

tere hansne pe jo hanste hain hansane wale

bin-bulae tere aa kar tujhe bahkate hain

saKHt na-KHwanda hain ye tujh ko paDhane wale

ashk-e-KHunin ki hun main sail mein Duba rahta

ye mera rang hai o pan chabane wale

yun gajar subh ka jaldi se baje wasl ki raat

are be-rahm are dil ke satane wale

guzri jo mujh pe so guzri hai na guzri tujh par

ghaDi ghaDiyal ki ghaDiyal bajaane wale

kyun na un nalon ko main pa-e-ba-zanjir rakhkhun

ai junun kaun hain ye ghul ke machane wale

jab kaha main ne ki sun haal kaha tan se ye

tum salamat raho ahwal sunane wale

panw ko hath lagaya tu laga kahne sarak

tujh ko qurban karun hath lagane wale

muttala matla-e-'ehsan' se tu ho rashk-e-qamar

tujh pe aashiq hue paigham ke lane wale