sunai deti nahin ab wo boliyan hai hai

sunā.ī detī nahīñ ab vo boliyāñ hai hai

kahāñ ga.iiñ vo hasīnoñ kī Toliyāñ hai hai

tamām 'umr bas ik ḳhvāb-e-gum-shuda ke liye

tarastī āñkhoñ ne rāteñ TaToliyāñ hai hai

diyā jalā ke naman nāg-devtā ko kiyā

phir us ne biin pe jo zulfeñ kholiyāñ hai hai

kisī ko yaad hai kashmīr san ikānve ke

shabāna chhāpe vo bhagdaḌ vo goliyāñ hai hai

ye ahl-e-dard jinheñ hasb-e-hāl kahte haiñ

lahū se ham ne vo tahrīreñ dho liyāñ hai hai

rafū-garoñ ne garebāñ ke chaak sī sī kar

jo sūiyāñ thiiñ jigar meñ chubho liyāñ hai hai

kabhī thā takiya jinheñ baal mere siine ke

parā.ī sej pe vo chupke roliyāñ hai hai

mire firāq meñ jin jin ke jism gadrā.e

uThīñ haiñ un kī mire aage Doliyāñ hai hai

'shafaq' na bhuul ki kashmīrī panditoñ ke saath

kisī zamāne meñ khelī haiñ holiyāñ hai hai

sunai deti nahin ab wo boliyan hai hai

kahan gain wo hasinon ki Toliyan hai hai

tamam 'umr bas ek KHwab-e-gum-shuda ke liye

tarasti aankhon ne raaten TaToliyan hai hai

diya jala ke naman nag-dewta ko kiya

phir us ne bin pe jo zulfen kholiyan hai hai

kisi ko yaad hai kashmir san ikanwe ke

shabana chhape wo bhagdaD wo goliyan hai hai

ye ahl-e-dard jinhen hasb-e-haal kahte hain

lahu se hum ne wo tahriren dho liyan hai hai

rafu-garon ne gareban ke chaak si si kar

jo suiyan thin jigar mein chubho liyan hai hai

kabhi tha takiya jinhen baal mere sine ke

parai sej pe wo chupke roliyan hai hai

mere firaq mein jin jin ke jism gadrae

uThin hain un ki mere aage Doliyan hai hai

'shafaq' na bhul ki kashmiri panditon ke sath

kisi zamane mein kheli hain holiyan hai hai