suno musafir! sarae-jaan ko tumhaari yaaden jala chuki hain

suno musāfir! sarā.e-jāñ ko tumhārī yādeñ jalā chukī haiñ

mohabbatoñ kī hikāyateñ ab yahāñ se Derā uThā chukī haiñ

vo shahr-e-hairat kā shāhzāda giraft-e-idrāk meñ nahīñ hai

us ek chehre kī hairatoñ meñ hazār āñkheñ samā chukī haiñ

ham apne sar par guzishta din kī thakan uThā.e bhaTak rahe haiñ

dayār-e-shab terī ḳhvāb-gāheñ tamām parde girā chukī haiñ

badalte mausam kī silvaToñ meñ dabī haiñ hijrat kī dāstāneñ

vo dāstāneñ jo sunñe vāloñ kī niiñd kab kī uḌā chukī haiñ

vo saarī sub.heñ tamām shāmeñ ki jin ke māthe pe ham likhe the

sunā hai kal shab tumhāre dar par lahū ke aañsū bahā chukī haiñ

kahāñ se aa.e the tiir ham par, tanābeñ ḳhemoñ kī kis ne kāTīñ

gurez kartī havā.eñ ham ko tamām bāteñ batā chukī haiñ

dhueñ ke bādal chhaTe to ham ne 'nabīl' dekhā ajiib manzar

ḳhamoshiyoñ kī sulagtī chīḳheñ fazā kā siina jalā chukī haiñ

suno musafir! sarae-jaan ko tumhaari yaaden jala chuki hain

mohabbaton ki hikayaten ab yahan se Dera uTha chuki hain

wo shahr-e-hairat ka shahzada giraft-e-idrak mein nahin hai

us ek chehre ki hairaton mein hazar aankhen sama chuki hain

hum apne sar par guzishta din ki thakan uThae bhaTak rahe hain

dayar-e-shab teri KHwab-gahen tamam parde gira chuki hain

badalte mausam ki silwaTon mein dabi hain hijrat ki dastanen

wo dastanen jo sunne walon ki nind kab ki uDa chuki hain

wo sari subhen tamam shamen ki jin ke mathe pe hum likhe the

suna hai kal shab tumhaare dar par lahu ke aansu baha chuki hain

kahan se aae the tir hum par, tanaben KHemon ki kis ne kaTin

gurez karti hawaen hum ko tamam baaten bata chuki hain

dhuen ke baadal chhaTe to hum ne 'nabil' dekha ajib manzar

KHamoshiyon ki sulagti chiKHen faza ka sina jala chuki hain