sunta hun main jal-pariyon ki sehr-bhari aawazon ko

suntā huuñ maiñ jal-pariyoñ kī sehr-bharī āvāzoñ ko

kashtī ke mastūl se jakḌā khol rahā huuñ rāzoñ ko

dekhtī rahtī haiñ do āñkheñ dhuñdlī dhuñdlī duurī meñ

mausamoñ ke andāz liye sab aate jaate jahāzoñ ko

in kā bharam rakhne meñ shāyad maiñ itnā chālāk nahīñ

mujh se uljhan hone lagī hai ab mere dam-sāzoñ ko

bhare hue tarkash be-qābū tāqat se ḳhālī baazū

duur khaḌā maiñ dekh rahā huuñ apne tīr-andāzoñ ko

ab ye pahāḌī chashme hī kuchh deñge mire āhang kā saath

tang aa kar patthar par maiñ ne toḌ diyā hai sāzoñ ko

bikhre hue piile pattoñ ko ghar āñgan meñ dekh rahā

itnī ghuTan thī maiñ ne baḌh kar khol diyā darvāzoñ ko

Takrā jaate haiñ rah-rah kar mere paroñ se haft-aflāk

khulī fazā milnā mushkil hai 'zeb' mirī parvāzoñ ko

sunta hun main jal-pariyon ki sehr-bhari aawazon ko

kashti ke mastul se jakDa khol raha hun raazon ko

dekhti rahti hain do aankhen dhundli dhundli duri mein

mausamon ke andaz liye sab aate jate jahazon ko

in ka bharam rakhne mein shayad main itna chaalak nahin

mujh se uljhan hone lagi hai ab mere dam-sazon ko

bhare hue tarkash be-qabu taqat se KHali bazu

dur khaDa main dekh raha hun apne tir-andazon ko

ab ye pahaDi chashme hi kuchh denge mere aahang ka sath

tang aa kar patthar par main ne toD diya hai sazon ko

bikhre hue pile patton ko ghar aangan mein dekh raha

itni ghuTan thi main ne baDh kar khol diya darwazon ko

Takra jate hain rah-rah kar mere paron se haft-aflak

khuli faza milna mushkil hai 'zeb' meri parwazon ko