surḳh ho jaatā hai muñh merī nazar ke bojh se
kyā banegī zevar-e-gul-hā-e-tar ke bojh se
yuuñ hue haiñ ḳhaak ba.ad-e-dafn tere nā-tavāñ
pis ga.e haiñ chādar-e-gul-hā-e-tar ke bojh se
sharm go kam ho ga.ī par nāzukī ko kyā kareñ
ab jhuke jaate haiñ ḳhud apnī nazar ke ke bojh se
uf rī terī nā-tavānī lāġharī allāh re zo.af
ek hī karvaT se huuñ dāġh-e-jigar ke bojh se
hilte haiñ abrū tire bār-e-gul-e-ruḳhsār se
jis tarah shāḳheñ lachaktī haiñ samar ke bojh se
dil se aaheñ chal chukī haiñ ho gayā mumkin visāl
ab laboñ tak aa nahīñ saktīñ asar ke bojh se
yās-o-hasrat se ye bulbul kī girāñbārī huī
laakh man kā hai qafas ik musht-e-par ke bojh se
jāma-e-aslī bahut kohna huā hai ai 'rashīd'
chaak ho jaa.e na ashk-e-chashm-e-tar ke bojh se
surKH ho jata hai munh meri nazar ke bojh se
kya banegi zewar-e-gul-ha-e-tar ke bojh se
yun hue hain KHak baad-e-dafn tere na-tawan
pis gae hain chadar-e-gul-ha-e-tar ke bojh se
sharm go kam ho gai par nazuki ko kya karen
ab jhuke jate hain KHud apni nazar ke ke bojh se
uf ri teri na-tawani laghari allah re zoaf
ek hi karwaT se hun dagh-e-jigar ke bojh se
hilte hain abru tere bar-e-gul-e-ruKHsar se
jis tarah shaKHen lachakti hain samar ke bojh se
dil se aahen chal chuki hain ho gaya mumkin visal
ab labon tak aa nahin saktin asar ke bojh se
yas-o-hasrat se ye bulbul ki giranbari hui
lakh man ka hai qafas ek musht-e-par ke bojh se
jama-e-asli bahut kohna hua hai ai 'rashid'
chaak ho jae na ashk-e-chashm-e-tar ke bojh se
Source:
Gulistan-e-Rasheed (Pg. ghazal-81 page-78)
-
Author:
Piyare Sahab Rasheed
-
- Year of Publication: 1952
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.