surur-e-gham ko KHarab ai KHarab-kar na kar

surūr-e-ġham ko ḳharāb ai ḳharāb-kār na kar

ḳhizāñ ke kaif ko ālūda-e-bahār na kar

naved-e-vasl se majbūr-e-intizār na kar

ab is qarār ke parde meñ be-qarār na kar

kisī ko chhoḌ ke merā sharīk-e-dard rahe

jo dil pe vaar kiyā hai jigar pe vaar na kar

nazar vo Daal sukūñ paa.e be-qarār tirā

nazar haTā ke ise aur be-qarār na kar

nigāh-e-shauq meñ bhar le tamām 'ālam-e-husn

mazāq-e-dīd ko pāband-e-rū-e-yār na kar

ye aur hosh se jaa.e na hosh meñ aa kar

tū apne be-ḳhud-e-ulfat ko hoshiyār na kar

nazar milā ke dil-o-jāñ ke lūTne vaale

mire hī zauq-e-tamannā se mujh pe vaar na kar

asīr-e-halqa-e-dām-e-ḳhayāl rahne de

mire vujūd se ab mujh ko sharm-sār na kar

dil aur zabān meñ koī bhī ahl-e-zabt nahīñ

dil-o-zabāñ ko mohabbat kā rāzdār na kar

jo 'aish-e-vasl mayassar nahīñ na ho ai dil

ġham-e-firāq mayassar hai sharmsār na kar

vo uTh ke rah ga.ī āvāz-e-jāñ-gudāz 'junūñ'

ab apnī zindagī-e-dil kā e'tibār na kar

surur-e-gham ko KHarab ai KHarab-kar na kar

KHizan ke kaif ko aaluda-e-bahaar na kar

nawed-e-wasl se majbur-e-intizar na kar

ab is qarar ke parde mein be-qarar na kar

kisi ko chhoD ke mera sharik-e-dard rahe

jo dil pe war kiya hai jigar pe war na kar

nazar wo Dal sukun pae be-qarar tera

nazar haTa ke ise aur be-qarar na kar

nigah-e-shauq mein bhar le tamam 'alam-e-husn

mazaq-e-did ko paband-e-ru-e-yar na kar

ye aur hosh se jae na hosh mein aa kar

tu apne be-KHud-e-ulfat ko hoshiyar na kar

nazar mila ke dil-o-jaan ke luTne wale

mere hi zauq-e-tamanna se mujh pe war na kar

asir-e-halqa-e-dam-e-KHayal rahne de

mere wujud se ab mujh ko sharm-sar na kar

dil aur zaban mein koi bhi ahl-e-zabt nahin

dil-o-zaban ko mohabbat ka raazdar na kar

jo 'aish-e-wasl mayassar nahin na ho ai dil

gham-e-firaq mayassar hai sharmsar na kar

wo uTh ke rah gai aawaz-e-jaan-gudaz 'junun'

ab apni zindagi-e-dil ka e'tibar na kar