سوئے منزل کوئی کارواں لٹ گیا

سوئے منزل کوئی کارواں لٹ گیا

کس کی امید کا یہ جہاں لٹ گیا

تو نے اف تک نہ کی دیکھتا رہ گیا

تیرے کوچہ میں اک کارواں لٹ گیا

کوئی حسرت نہ گلچیں کے دل میں رہی

پھول مرجھا گئے گلستاں لٹ گیا

تم تو ہشیار تھے کیوں ہوئے بے خبر

دل تو نادان تھا ناگہاں لٹ گیا

کوئی آئے مدد کے لئے اب مری

گل رخاں لٹ گیا مہوشاں لٹ گیا

ہے شکایت تجھی سے مرے مہرباں

پیش درباں ترا مہماں لٹ گیا

شیخ بھی کتنا شاداںؔ بلانوش تھا

باتوں باتوں میں پیر مغاں لٹ گیا