suraj se bad-guman raha suraj-mukhi ka phul

sūraj se bad-gumāñ rahā sūraj-mukhī kā phuul

lekin sadā javāñ rahā sūraj-mukhī kā phuul

tab tak vo dhuup ḳhāna-e-dil meñ paḌī rahī

jab tak ki hirz-e-jāñ rahā sūraj-mukhī kā phuul

boyā thā maiñ ne biij kabhī apnī ḳhaak meñ

mujh meñ ravāñ-davāñ rahā sūraj-mukhī kā phuul

shaam aa.ī hai to lauT ke aayā hai shāḳh par

din-bhar magar kahāñ rahā sūraj-mukhī kā phuul

mausam ne shāḳh-e-jāñ meñ ka.ī rang bhar diye

rangoñ meñ shādmāñ rahā sūraj-mukhī kā phuul

rangoñ ke darmiyāñ rahe phūloñ ke qāfile

phūloñ ke darmiyāñ rahā sūraj-mukhī kā phuul

maiñ ne vo dāstāñ bhī sunī hai bahār se

jis meñ abad-nishāñ rahā sūraj-mukhī kā phuul

ḳhushbū ne sun ke aah bharī us ke dil kī baat

kahne ko be-zabāñ rahā sūraj-mukhī kā phuul

rang 'āzar' us pe 'arsh se utre hoñ jis tarah

miTTī meñ go nihāñ rahā sūraj-mukhī kā phuul

suraj se bad-guman raha suraj-mukhi ka phul

lekin sada jawan raha suraj-mukhi ka phul

tab tak wo dhup KHana-e-dil mein paDi rahi

jab tak ki hirz-e-jaan raha suraj-mukhi ka phul

boya tha main ne bij kabhi apni KHak mein

mujh mein rawan-dawan raha suraj-mukhi ka phul

sham aai hai to lauT ke aaya hai shaKH par

din-bhar magar kahan raha suraj-mukhi ka phul

mausam ne shaKH-e-jaan mein kai rang bhar diye

rangon mein shadman raha suraj-mukhi ka phul

rangon ke darmiyan rahe phulon ke qafile

phulon ke darmiyan raha suraj-mukhi ka phul

main ne wo dastan bhi suni hai bahaar se

jis mein abad-nishan raha suraj-mukhi ka phul

KHushbu ne sun ke aah bhari us ke dil ki baat

kahne ko be-zaban raha suraj-mukhi ka phul

rang 'azar' us pe 'arsh se utre hon jis tarah

miTTi mein go nihan raha suraj-mukhi ka phul