ta’bir-e-KHwab karte hain naqsha banate hain

tā’bīr-e-ḳhvāb karte haiñ naqsha banāte haiñ

ghar is baḌe jahān meñ apnā banāte haiñ

auroñ kī dāstān meñ kuchh bhī nayā nahīñ

ham apne 'ishq se koī qissa banāte haiñ

apne vujūd ke sabhī patthar nikāl kar

phir do diloñ ke biich meñ rasta banāte haiñ

siine se dil nikal ke kahīñ aur jā basā

apne badan kā phir use hissa banāte haiñ

bārūd aag kī kisī bhaTTī meñ Daal kar

bachchoñ ke vāste koī basta banāte haiñ

lāshoñ ke Dher par koī mātam-kunāñ nahīñ

kitnā ye log ḳhuun ko sastā banāte haiñ

is shor meñ to kuchh bhī sunā.ī na de 'ḳhizar'

ḳhāmoshiyoñ kī baat kā lahja banāte haiñ

ta’bir-e-KHwab karte hain naqsha banate hain

ghar is baDe jahan mein apna banate hain

auron ki dastan mein kuchh bhi naya nahin

hum apne 'ishq se koi qissa banate hain

apne wujud ke sabhi patthar nikal kar

phir do dilon ke bich mein rasta banate hain

sine se dil nikal ke kahin aur ja basa

apne badan ka phir use hissa banate hain

barud aag ki kisi bhaTTi mein Dal kar

bachchon ke waste koi basta banate hain

lashon ke Dher par koi matam-kunan nahin

kitna ye log KHun ko sasta banate hain

is shor mein to kuchh bhi sunai na de 'KHizar'

KHamoshiyon ki baat ka lahja banate hain