تا حد نظر آج جو پھیلا ہے سمندر

تا حد نظر آج جو پھیلا ہے سمندر

اک سویا ہوا دیوتا لگتا ہے سمندر

جتنی بھی ہے دھرتی سے ہمالہ کی بلندی

اتنا ہی یہ سنتے ہیں کہ گہرا ہے سمندر

دھرتی کے سلگتے ہوئے سینے پہ ہمیشہ

بادل کی طرح ٹوٹ کے برسا ہے سمندر

بچے نے کہا دیکھ کے آکاش کی جانب

ہر چیز کے دو رخ ہیں یہ الٹا ہے سمندر

پوچھا یہ سمندر نے کسی اشک سے اک دن

قطرے میں کبھی آپ نے دیکھا ہے سمندر

اب تک تو نہیں ہاتھ لگی چاند کی دلہن

راتوں کو کئی بار یہ لپکا ہے سمندر

نفرت کے جزیرے بھی کئی ایک ہیں لیکن

ہر دل میں کنولؔ پیار کا بہتا ہے سمندر