tarikiyon ko aag dikhai gahe gahe

tārīkiyoñ ko aag dikhā.ī gahe gahe

fikr-o-nazar kī sham' jalā.ī gahe gahe

kuchh shorish-e-hayāt ne bhī dar-ba-dar kiyā

kuchh ham ne apnī ḳhaak uḌaa.ī gahe gahe

tauba hazār baar mai-e-nāb se karūñ

mahsūs kar ke lutf-e-ḳhudā.ī gahe gahe

sayyād khol khol ke darvāza-e-qafas

parkhe hai merā shauq-e-rihā.ī gahe gahe

maiñ ḳhud hī chheḌ detā huuñ az-rāh-e-rasm-o-rāh

dil kī ḳhirad ke saath laḌā.ī gahe gahe

āshuftagī pe kitne girafta haiñ mere yaar

dete haiñ mujh ko merī safā.ī gahe gahe

ghaav to kab ke bhar ga.e piitā huuñ 'ādatan

do-chār ghūñT ek davā.ī gahe gahe

ḳhud bhī 'amar' bisāt-e-taḳhayyul pe kī dhamāl

nok-e-qalam bhī ḳhuub nachā.ī gahe gahe

tarikiyon ko aag dikhai gahe gahe

fikr-o-nazar ki sham' jalai gahe gahe

kuchh shorish-e-hayat ne bhi dar-ba-dar kiya

kuchh hum ne apni KHak uDai gahe gahe

tauba hazar bar mai-e-nab se karun

mahsus kar ke lutf-e-KHudai gahe gahe

sayyaad khol khol ke darwaza-e-qafas

parkhe hai mera shauq-e-rihai gahe gahe

main KHud hi chheD deta hun az-rah-e-rasm-o-rah

dil ki KHirad ke sath laDai gahe gahe

aashuftagi pe kitne girafta hain mere yar

dete hain mujh ko meri safai gahe gahe

ghaw to kab ke bhar gae pita hun 'adatan

do-chaar ghunT ek dawai gahe gahe

KHud bhi 'amar' bisat-e-taKHayyul pe ki dhamal

nok-e-qalam bhi KHub nachai gahe gahe