taron se mahtab se aur kahkashan se kya

tāroñ se māhtāb se aur kahkashāñ se kyā

merā vatan zamīñ hai mujhe āsmāñ se kyā

TukḌe jigar ke hoñ ki Tapaktā ho ḳhūn-e-dil

unvāñ jo tum nahīñ to tumheñ dāstāñ se kyā

jiinā jo jāntā ho taḌap kar tire baġhair

is ko tirī galī se tire āstāñ se kyā

un kā na sāmnā ho usī meñ hai āfiyat

kyā jāniye ki nikle hamārī zabāñ se kyā

utregā jab ḳhumār vahī hoñge ranj-o-ġham

dil ko sukūñ milegā mai-e-arġhavāñ se kyā

ai dil hai kis liye tujhe āvārgī kā shauq

tū bhī bichhaḌ gayā hai kisī kārvāñ se kyā

ġham hai shikast kā na ḳhushī fat.h kī 'falak'

mujh ko amal se kaam hai sūd-o-ziyāñ se kyā

taron se mahtab se aur kahkashan se kya

mera watan zamin hai mujhe aasman se kya

TukDe jigar ke hon ki Tapakta ho KHun-e-dil

unwan jo tum nahin to tumhein dastan se kya

jina jo jaanta ho taDap kar tere baghair

is ko teri gali se tere aastan se kya

un ka na samna ho usi mein hai aafiyat

kya jaaniye ki nikle hamari zaban se kya

utrega jab KHumar wahi honge ranj-o-gham

dil ko sukun milega mai-e-arghawan se kya

ai dil hai kis liye tujhe aawargi ka shauq

tu bhi bichhaD gaya hai kisi karwan se kya

gham hai shikast ka na KHushi fath ki 'falak'

mujh ko amal se kaam hai sud-o-ziyan se kya