taza-dam jazba-e-safar rakkha

tāza-dam jazba-e-safar rakkhā

ham ne manzil ko rah-guzar rakkhā

ehtirām-e-rah-e-talab dekho

paaoñ rakhnā thā ham ne sar rakkhā

tere ik jalva-e-tabassum ko

zindagī ne sahar sahar rakkhā

terī āgāhī-e-mohabbat ne

ham ko tujh se bhī be-ḳhabar rakkhā

aaj bazm-e-ḳhayāl meñ ham ne

der tak un ko jalva-gar rakkhā

'aql ne merī gumr-ahī ke liye

har qadam 'ālam-e-ḳhabar rakkhā

ham ne is hasrat-e-tamāshā meñ

naam jalve kā bhī nazar rakkhā

apnī rusvā.iyoñ ke parde meñ

ham ne kis kis ko mo'tabar rakkhā

ab hunar 'aib hai magar 'tābish'

ham ne is 'aib ko hunar rakkhā

taza-dam jazba-e-safar rakkha

hum ne manzil ko rah-guzar rakkha

ehtiram-e-rah-e-talab dekho

paon rakhna tha hum ne sar rakkha

tere ek jalwa-e-tabassum ko

zindagi ne sahar sahar rakkha

teri aagahi-e-mohabbat ne

hum ko tujh se bhi be-KHabar rakkha

aaj bazm-e-KHayal mein hum ne

der tak un ko jalwa-gar rakkha

'aql ne meri gumr-ahi ke liye

har qadam 'alam-e-KHabar rakkha

hum ne is hasrat-e-tamasha mein

nam jalwe ka bhi nazar rakkha

apni ruswaiyon ke parde mein

hum ne kis kis ko mo'tabar rakkha

ab hunar 'aib hai magar 'tabish'

hum ne is 'aib ko hunar rakkha