tabahi bastiyon ki hai nigahbanon se wabasta

tabāhī bastiyoñ kī hai nigahbānoñ se vābasta

gharoñ kā rañj vīrānī hai mehmānoñ se vābasta

safar qadmoñ se vābasta hai lekin rāsta apnā

gulistānoñ se vābasta na vīrānoñ se vābasta

sadāqat bhī to ho jaatī hai maqtūl-e-fareb āḳhir

haqīqat bhī to ho jaatī hai afsānoñ se vābasta

supurd-e-ḳhāk ham ne hī kiyā kitne azīzoñ ko

hamīñ ne kar diye haiñ phuul vīrānoñ se vābasta

tahī-dastī ne tanhā kar diyā har ek mahfil meñ

bujhī sham.eñ nahīñ rahtī haiñ parvānoñ se vābasta

charāġhoñ ko rakhā jaatā hai āñdhī aur tūfāñ meñ

farishtoñ ko kiyā jaatā hai shaitānoñ se vābasta

sahīfoñ meñ kahīñ tahrīr raushan thī yahī 'rāhī'

zamīñ par the kabhī insān insānoñ se vābasta

tabahi bastiyon ki hai nigahbanon se wabasta

gharon ka ranj virani hai mehmanon se wabasta

safar qadmon se wabasta hai lekin rasta apna

gulistanon se wabasta na viranon se wabasta

sadaqat bhi to ho jati hai maqtul-e-fareb aaKHir

haqiqat bhi to ho jati hai afsanon se wabasta

supurd-e-KHak hum ne hi kiya kitne azizon ko

hamin ne kar diye hain phul viranon se wabasta

tahi-dasti ne tanha kar diya har ek mahfil mein

bujhi shamen nahin rahti hain parwanon se wabasta

charaghon ko rakha jata hai aandhi aur tufan mein

farishton ko kiya jata hai shaitanon se wabasta

sahifon mein kahin tahrir raushan thi yahi 'rahi'

zamin par the kabhi insan insanon se wabasta