تبھی تو کام ملا تھا کسی کو کھونے کا

تبھی تو کام ملا تھا کسی کو کھونے کا

مجھے ہی علم تھا بس ٹھیک ٹھاک رونے کا

کئی برس کی مشقت کے بعد اس دل میں

جگاڑ بھی ہوا تو صرف ایک کونے کا

یوں ایک دریا کو کھلتی ہے میری تیراکی

طریقہ سیکھ رہا ہے مجھے ڈبونے کا

کھلونا ٹوٹ گیا بول بھی نہ پایا کچھ

اسے بھی فکر نہیں کیا ہوا کھلونے کا

کل ایک پھول چنبیلی کا مر گیا آخر

بہت دباؤ تھا اس پر گلاب ہونے کا

وہ اپسرا بھی رہے اور وفا بھی کرتی ہو

ہرن ہی چاہیئے مجھ کو ہرن بھی سونے کا