tafrih-e-chashm-o-dil ko gulistan hai shaeri

tafrīh-e-chashm-o-dil ko gulistāñ hai shā.erī

ai ahl-e-zauq hāsil-e-armāñ hai shā.erī

mastī-e-kaif-o-naġhma barasne lage agar

raqs-e-bahār jalva-e-jānāñ hai shā.erī

hai lā-shu.ūr ke liye talbīs-e-ahraman

īmān ho to rahmat-e-yazdāñ hai shā.erī

ahl-e-nazar ne bhar liye dāman umiid ke

gulhā-e-rang rang-e-bahārāñ hai shā.erī

ho sheriyat nasīb to rashk-e-chaman bane

vahshat huī yūñhī to bayābāñ hai shā.erī

shāhid haiñ mere qaul pe tārīḳh ke varaq

parvarda-e-tamaddun-e-insāñ hai shā.erī

dhul jaatī hai jo kausar-o-tasnīm se zabāñ

jannat-nisār-o-hūr badāmāñ hai shā.erī

ye falsafa ḳhulāsa-e-har-qīl-o-qāl hai

mushkil agar nahīñ hai to āsāñ hai shā.erī

'sāqib' bayāz-e-sher kī tartīb ḳhaas ho

aurāq-e-gul kī tarah pareshāñ hai shā.erī

tafrih-e-chashm-o-dil ko gulistan hai shaeri

ai ahl-e-zauq hasil-e-arman hai shaeri

masti-e-kaif-o-naghma barasne lage agar

raqs-e-bahaar jalwa-e-jaanan hai shaeri

hai la-shuur ke liye talbis-e-ahraman

iman ho to rahmat-e-yazdan hai shaeri

ahl-e-nazar ne bhar liye daman umid ke

gulha-e-rang rang-e-bahaaran hai shaeri

ho sheriyat nasib to rashk-e-chaman bane

wahshat hui yunhi to bayaban hai shaeri

shahid hain mere qaul pe tariKH ke waraq

parwarda-e-tamaddun-e-insan hai shaeri

dhul jati hai jo kausar-o-tasnim se zaban

jannat-nisar-o-hur badaman hai shaeri

ye falsafa KHulasa-e-har-qil-o-qal hai

mushkil agar nahin hai to aasan hai shaeri

'saqib' bayaz-e-sher ki tartib KHas ho

auraq-e-gul ki tarah pareshan hai shaeri