تفریح چشم و دل کو گلستاں ہے شاعری

تفریح چشم و دل کو گلستاں ہے شاعری

اے اہل ذوق حاصل ارماں ہے شاعری

مستیٔ کیف و نغمہ برسنے لگے اگر

رقص بہار جلوۂ جاناں ہے شاعری

ہے لا شعور کے لئے تلبیس اہرمن

ایمان ہو تو رحمت یزداں ہے شاعری

اہل نظر نے بھر لئے دامن امید کے

گلہائے رنگ رنگ بہاراں ہے شاعری

ہو شعریت نصیب تو رشک چمن بنے

وحشت ہوئی یوں ہی تو بیاباں ہے شاعری

شاہد ہیں میرے قول پہ تاریخ کے ورق

پروردۂ تمدن انساں ہے شاعری

دھل جاتی ہے جو کوثر و تسنیم سے زباں

جنت نثار و حور بداماں ہے شاعری

یہ فلسفہ خلاصۂ ہر قیل و قال ہے

مشکل اگر نہیں ہے تو آساں ہے شاعری

ثاقبؔ بیاض شعر کی ترتیب خاص ہو

اوراق گل کی طرح پریشاں ہے شاعری