tahzibi aqdar se mahka basta pichhe chhuT gaya

tahzībī aqdār se mahkā basta pīchhe chhūT gayā

jaane kis vahshat meñ ghar kā rasta pīchhe chhūT gayā

bachche merī uñglī thāme dhīre dhīre chalte the

phir vo aage dauḌ ga.e maiñ tanhā pīchhe chhūT gayā

'ahd-e-javānī ro-ro kaaTā 'mīr' miyāñ sā haal huā

lekin un ke aage apnā qissa pīchhe chhūT gayā

pīchhe muḌ kar dekhegā to aage baḌhnā mushkil hai

maiñ ne kitnī baar kahā thā dekhā pīchhe chhūT gayā

ik do bāteñ kahnī hoñ to kahnā sunñā āsāñ hai

ab ham tum ko kyā batlā.eñ kyā kyā pīchhe chhūT gayā

sar-tā-pā sairāb the 'ḳhālid' chāroñ jānib dariyā thā

pyaas meñ jis dam shiddat aa.ī dariyā pīchhe chhūT gayā

tahzibi aqdar se mahka basta pichhe chhuT gaya

jaane kis wahshat mein ghar ka rasta pichhe chhuT gaya

bachche meri ungli thame dhire dhire chalte the

phir wo aage dauD gae main tanha pichhe chhuT gaya

'ahd-e-jawani ro-ro kaTa 'mir' miyan sa haal hua

lekin un ke aage apna qissa pichhe chhuT gaya

pichhe muD kar dekhega to aage baDhna mushkil hai

main ne kitni bar kaha tha dekha pichhe chhuT gaya

ek do baaten kahni hon to kahna sunna aasan hai

ab hum tum ko kya batlaen kya kya pichhe chhuT gaya

sar-ta-pa sairab the 'KHalid' chaaron jaanib dariya tha

pyas mein jis dam shiddat aai dariya pichhe chhuT gaya