تہذیبی اقدار سے مہکا بستہ پیچھے چھوٹ گیا

تہذیبی اقدار سے مہکا بستہ پیچھے چھوٹ گیا

جانے کس وحشت میں گھر کا رستہ پیچھے چھوٹ گیا

بچے میری انگلی تھامے دھیرے دھیرے چلتے تھے

پھر وہ آگے دوڑ گئے میں تنہا پیچھے چھوٹ گیا

عہد جوانی رو رو کاٹا میرؔ میاں سا حال ہوا

لیکن ان کے آگے اپنا قصہ پیچھے چھوٹ گیا

پیچھے مڑ کر دیکھے گا تو آگے بڑھنا مشکل ہے

میں نے کتنی بار کہا تھا دیکھا پیچھے چھوٹ گیا

اک دو باتیں کہنی ہوں تو کہنا سننا آساں ہے

اب ہم تم کو کیا بتلائیں کیا کیا پیچھے چھوٹ گیا

سر تا پا سیراب تھے خالدؔ چاروں جانب دریا تھا

پیاس میں جس دم شدت آئی دریا پیچھے چھوٹ گیا