taKHayyul ke kaman se yun suKHan ka tir nikla hai

taḳhayyul ke kamāñ se yuuñ suḳhan kā tiir niklā hai

ki merā she'r to patthar diloñ ko chiir niklā hai

vahī ik ḳhvāb-e-be-tā’bīr jo āñkhoñ meñ aayā thā

vo ban ke ashk in palkoñ se pur-tāsīr niklā hai

vo qissa 'ishq kā tahrīr hai dīvār par lekin

vujūd us kā haqīqat meñ pas-e-tā'mīr niklā hai

samajh jis ko rahe the ham faqat do chaar din kā ġham

vo aisā hijr hai jo mas.ala gambhīr niklā hai

yahāñ jo kar rahā thā tabsirā kirdār par mere

mire aate hī bechāra bilā-tāḳhīr niklā hai

dil-e-'afshār' par us ne ik aisā ism phūñkā hai

ki siine ke qafas se toḌ kar zanjīr niklā hai

taKHayyul ke kaman se yun suKHan ka tir nikla hai

ki mera she'r to patthar dilon ko chir nikla hai

wahi ek KHwab-e-be-ta’bir jo aankhon mein aaya tha

wo ban ke ashk in palkon se pur-tasir nikla hai

wo qissa 'ishq ka tahrir hai diwar par lekin

wujud us ka haqiqat mein pas-e-ta'mir nikla hai

samajh jis ko rahe the hum faqat do chaar din ka gham

wo aisa hijr hai jo masala gambhir nikla hai

yahan jo kar raha tha tabsira kirdar par mere

mere aate hi bechaara bila-taKHir nikla hai

dil-e-'afshaar' par us ne ek aisa ism phunka hai

ki sine ke qafas se toD kar zanjir nikla hai