taKHliq pe fitrat ki guzarta hai guman aur

taḳhlīq pe fitrat kī guzartā hai gumāñ aur

is ādam-e-ḳhākī ne banāyā hai jahāñ aur

ye sub.h hai sūraj kī siyāhī se añdherī

aa.egī abhī ek sahar mahr-chakāñ aur

baḌhnī hai abhī aur bhī mazlūm kī tāqat

ghaTnī hai abhī zulm kī kuchh tāb-o-tavāñ aur

tar hogī zamīñ aur abhī ḳhūn-e-bashar se

ro.egā abhī dīda-e-ḳhūnāba-fiashāñ aur

baḌhne do zarā aur abhī kuchh dast-e-talab ko

baḌh jā.egī do chaar shikan-e-zulf-e-butāñ aur

karnā hai abhī ḳhūn-e-jigar sarf-e-bahārāñ

kuchh der uThānā hai abhī nāz-e-ḳhizāñ aur

ham haiñ vo balā-kash ki masā.ib se jahāñ ke

ho jaate haiñ shā.ista-e-ġham-hā-e-jahāñ aur

taKHliq pe fitrat ki guzarta hai guman aur

is aadam-e-KHaki ne banaya hai jahan aur

ye subh hai suraj ki siyahi se andheri

aaegi abhi ek sahar mahr-chakan aur

baDhni hai abhi aur bhi mazlum ki taqat

ghaTni hai abhi zulm ki kuchh tab-o-tawan aur

tar hogi zamin aur abhi KHun-e-bashar se

roega abhi dida-e-KHunaba-fiashan aur

baDhne do zara aur abhi kuchh dast-e-talab ko

baDh jaegi do chaar shikan-e-zulf-e-butan aur

karna hai abhi KHun-e-jigar sarf-e-bahaaran

kuchh der uThana hai abhi naz-e-KHizan aur

hum hain wo bala-kash ki masaib se jahan ke

ho jate hain shaista-e-gham-ha-e-jahan aur